सोमबार, असार ७ २०७८

दुर्घटनामा परेर थलिएकी मोडलको उद्धार, उद्धारपछि बुवाले भने- कलियुगमा पनि भगवान रहेछन्


  • नेपालदीप
  • बिहिबार, जेष्ठ २७ २०७८
1.8K
SHARES

काठमाडौँ। दुर्घटनामा परेर तीन वर्षदेखि अर्धचेत अवस्थामा रहेकी कलाकार तथा मोडल निशा घिमिरेको उद्धार गरिएको छ। नर्भिक अस्पतालका प्रबन्ध निर्देशक मेघा चौधरीले मोडल तथा कलाकार घिमिरेको आज उद्धार गरेकी हुन्।

नर्भिक अस्पतालकी प्रबन्ध निर्देशक चौधरीले घिमिरेको दर्दनाक अवस्था फोटोमा देखेपछि आफूले उद्धार गरेको बताइन्। अब आफ्नै समन्वयमा उनको सम्भव हुनेजति उपचार गरिने उनले जानकारी दिइन्।

हातखुट्टा नै कुँजिएर ओछ्यान परेको ३ वर्षपछि उनको उद्धार भएकोमा छिमेकी र उनका अभिभावक समेत खुशी छन्।

निशाका बुबाले भने, ‘यो कलियुगमा पनि भगवान हुँदा रहेछन्। मेरी छोरीलाई उद्धार गर्नेको भलो होस्। छोरी जिउँदो लाश भएर लडेकी ३ वर्ष भयो। अब चाहिँ थोरै भए पनि उठ्छे कि भन्ने आशा पलाएर आएको छ।’

आर्थिक अभावका कारण उपचार नपाउँदा निशाको यो हाल भएको हो।

तीन वर्षअघि अभिनयको कोर्स पढ्न उनी भारतको देहरादून जाँदै गर्दा सडक दुर्घटनामा परी गम्भीर घाइते भएकी थिइन्। दुर्घटनालगत्तै उनको भारतकै अस्पतालमा उपचार गरिएको थियो। तर, त्यहाँको अस्पतालको उपचार महङ्गो भएपछि कमजोर आर्थिक अवस्थाका कारण उनलाई नेपाल झिकाएर उपचार गरिएको थियो।

काठमाडौँमा ल्याएर ट्रमा सेन्टरमा राखेर तीन महिनासम्म उपचार गरिएको थियो। तर, उनको अवस्थामा सुधार हुन सकेन। त्यसपछि उनि घरमा नै थन्किएको थिइन्।

आमाबुबा दैनिक ज्यालादारी गर्न जानुपर्ने भएकोले उनको पर्याप्त हेरविचार समेत हुन नसकेको उनलाई नजिकबाट चिन्ने र उद्धारका लागि समन्वयकर्ताको भूमिका खेलेका नवजीवन परोपकार समाजका संचालक दुर्गानाथ दाहालले बताए। उनले भने, ‘कलाकार घिमिरेको दर्दनाक अवस्थाको विषयमा मैले फेसबुकमा पोस्ट गरेको थिएँ, त्यसमा नर्भिककी प्रबन्ध निर्देशक चौधरीले चासो राख्नुभयो र उहाँले आफ्नो समन्वयमा उपचार प्रबन्ध मिलाउने भनेर उद्धार गर्ने व्यवस्था मिलाउनुभएको हो।’

दाहालका अनुसार दुर्घटनाअघि ६० केजीभन्दा बढी तौल भएकी कलाकार घिमिरेको आहार, हेरविचार र उचित उपचारको अभावमा तौल घटेर २० केजी भएको छ।

बिहीबार बिहान कलाकार घिमिरेको उद्धार गरिएको थियो। उनलाई लिन नर्भिक अस्पतालको एम्बुलेन्स गएको थियो। हाल उनको नर्भिक अस्पतालमा राखेर उपचार थालिएको छ।

प्रारम्भिक जाँचको क्रममा उनमा नशाको समस्या देखिएको छ। शरीरका महत्वपूर्ण अंगहरु मुटु, मृगौला, कलेजो, फोक्सो लगायतमा ठूलो समस्या नदेखिएको चिकित्सकले बताएका छन्।

नर्भिकका चिकित्सकहरुले निशाको अवस्थामा सुधार हुने अपेक्षा गरेका छन्।

‘पहिलाजस्तै मोडलिङ नै गर्ने गरी त ठीक नहोला,’ चिकित्सकहरुलाई उद्धृत गर्दै दुर्गा दाहालले भने, ‘तर कम्तीमा आफै हिँडडूल गर्नसक्ने, आफै खानसक्ने र केही बोल्न सक्नेसम्म पनि भयो भने पनि धेरै हुन्छ।’

हाल निशा बोल्न सक्दिनन्। अरुले खुवाइदिनुपर्छ। कसैले केही कुरा गर्‍यो भने सुन्न सक्छिन् र आँसु बगाउने गर्छिन्। जवाफ दिन वा अरुलाई रेसपोन्स गर्नसक्ने अवस्थामा छैनन्।

 

नेपालदीपमा प्रकाशित सामग्रीबारे तपाईको गुनासो, सुझाव तथा सुचना भए हामीलाई [email protected] मा पठाउनु होला ।

प्रतिक्रिया
सम्बन्धित समाचार

ताजा अपडेट