बुधबार, मंसिर १५ २०७८

बागमती प्रदेशकी मुख्यमन्त्री अष्टलक्ष्मी शाक्यद्वारा पदबाट राजीनामा



  • नेपालदीप
  • बुधबार, कार्तिक १० २०७८
665
SHARES

काठमाडौँ। बागमती प्रदेशकी मुख्यमन्त्री अष्टलक्ष्मी शाक्यले पदबाट राजीनामा दिने घोषणा गरेकी छन्। आज प्रदेश सभा बैठकमा सम्बोधन गर्दै उनले राजीनामा दिने घोषणा गरेकी हुन्।

प्रदेश सभामा शाक्यले भनिन्, ‘मुख्यमन्त्रीको नाताले मैले मार्गप्रशस्त गरेकी छु। आगामी दिनमा मिलेर अगाडि बढ्न यही बाटो ठिक हुन्छ भन्ने एमालेलाई लाग्यो। मन्त्रीहरू र दलको बैठक पनि बसियो। यसैगरी जाँदा राम्रो हुन्छ भनेर मार्गप्रशस्त गरेकी छु।’

विश्वासको मत लिने प्रस्तावमाथि मत विभाजन गर्न आज प्रदेश सभा बैठक बसेको थियो। विश्वासको मत नपाउने निश्चित भएपछि उनले मुख्यमन्त्री पदबाट राजीनामा दिएकी छन्।

नेकपा एमालेकी उपाध्यक्षसमेत रहेकी शाक्य भदौ २ मा मुख्यमन्त्री बनेकी थिइन्। मुख्यमन्त्री बनेदेखि नै उनी अल्पमतमा परेकी थिइन्। उनले अल्पमतकै भए पनि सरकार चलाएको र प्रभावकारी काम गरेको दाबी गरेकी थिइन्।

उनले आफूलाई सहयोग गर्ने सबैलाई धन्यबादसमेत दिएकी छन्। प्रदेश सभामा बोल्दै उनले एकतावद्ध भएर अगाडि बढ्न आह्वान गरेकी थिइन्। प्रदेश विकास गर्ने हो भने सबै दल मिलेर अगाडि बढ्नुपर्ने उनको भनाइ थियो।

अब बागमती प्रदेशमा विपक्षी गठबन्धनबाट मुख्यमन्त्री बन्ने भएका छन्। नेकपा (एकीकृत समाजवादी) का नेता राजेन्द्र पाण्डे भावी मुख्यमन्त्रीका रूपमा अघि बढेका छन्। सभामुखले अर्को सूचना जारी नहुन्जेलसम्मका लागि प्रदेश सभाको बैठक स्थगित गरेका छन्।

नेपालदीपमा प्रकाशित सामग्रीबारे तपाईको गुनासो, सुझाव तथा सुचना भए हामीलाई [email protected] मा पठाउनु होला ।

प्रतिक्रिया
सम्बन्धित समाचार

ताजा अपडेट