बुधबार, मंसिर १५ २०७८

स्याङ्जा जिल्ला सभापतिमा थापाको बलियो दाबेदारी



  • नेपालदीप
  • बुधबार, मंसिर ८ २०७८
2.4K
SHARES

काठमाडौँ। नेपाली कांग्रेसको १४ औं महाधिवेशन अन्तर्गत जिल्ला अधिवेशनहरु सुरु हुने क्रममा छन्। यसैबीच कांग्रेस स्याङ्जा जिल्ला सभापतिको लागि सविधानसभा सदस्य राजु थापाले दाबेदारी प्रस्तुत गरेका छन्। कांग्रेसको विरासतपूर्ण इतिहासलाई फर्काउने भन्दै थापाले उम्मेदवारी दिएका छन्।

१२ औं र १३ औं महाधिवेशनमा समेत महासमिति सदस्य निर्वाचित थापाले जिल्ला सभापतिका रुपमा आफ्ना दुई दर्जनभन्दा बढी एजेन्डा सार्वजनिक गरेका छन्। विगतमा प्रतिनिधि सभा, प्रदेश सभा र स्थानीय तहको आम निर्वाचनमा आफ्नो दलका लागि महत्वपूर्ण योगदान गरेका थापाले सभापतिका रुपमा पार्टीलाई एक ढिक्का बनाएर लैजाने प्रतिबद्धता व्यक्त गरेका छन्। थापाकै महत्त्वपूर्ण योगदानले स्याङ्जाबाट प्रदेश सभामा प्रकाश मल्ल निर्वाचित हुन सफल भएका थिए। मल्ल आफै अहिले सभापतिका प्रत्यासी बनेका छन्। थापाकै सहयोगमा मल्ल स्याङ्जा तरुण दलको सभापति बनेका थिए।

जिल्ला सभापतिका रुपमा पार्टीका पुराना र वरिष्ठ व्यक्ति आउनुपर्ने आफ्नो मान्यता भएपनि परिस्थितिले सभापतिमा दाबेदारी प्रस्तुत गर्नुपरेको थापाको भनाई छ। ‘पार्टी सभापति कमल पङ्गेनीको असामयिक निधन पछि पार्टीलाई परेको गम्भीर असरको रिक्तता परिपुर्त गर्न र जिल्लामा पार्टीको औचित्य स्थापित गर्न आफै उम्मेदवार हुनुपर्छ भनेर लागेको हुँ’ उनले भने।

आफ्नो नेतृत्वमा स्याङ्जामा काङ्रेसको उपस्तिथि बलियो हुने र साङ्गठनिक रुपमा थप सुदृढ बन्ने थापाको भनाई छ। यसअघिको प्रतिनिधि सभा निर्वाचनमा पराजित भएपनि तत्क्षण नै पार्टीको हरेक गतिविधि र आम कार्यकर्ताको दु:खसुखमा साथ दिने नेताको रुपमा थापा लोकप्रिय मानिन्छन ।

जिल्ला सभापतिका लागी यही मङ्सिर १० गते निर्वाचन हुदैछ।

यस्ता छन् थापाका एजेन्डाहरु :

– नेपाली काङ्रेसको विरासतपूर्ण इतिहासलाई वर्तमानसङ्ग जोड्ने
– सङ्गठन विस्तार र संरचनात्मक सुधारलाई तिव्र बनाउने
आगामी निर्वाचनमा हरेक तहमा नेपाली काङ्रेसको जितको आधार तयार गर्ने
-जिल्लाभित्रका सम्पूर्ण विभाग र समितिलाई सक्रिय बनाउने
-पार्टीका सम्पूर्ण सदस्यहरुको डिजिटल अभिलेख राख्ने, समय-समयमा अद्यावधिक गर्ने
-पार्टीभित्र समावेशिताको उत्कृष्ट अभ्यास गर्ने
-स्थानीय आवश्यकता र मागको आधारमा विकास निर्माणमा सहजीकरण र नेतृत्व प्रदान गर्ने
– नेपाली काङ्रेसका सम्पूर्ण सदस्यहरुलाई सामाजिक क्रियाकलापमा अग्रसर बनाउने,उत्पादनमूलक गतिविधिमा जोड्ने
– सदस्यहरुको समस्यामा राजनीतिक अभिवाकत्व प्रदान गर्ने
– ‘अध्ययनशील र प्रविधिमैत्री’ काङ्ग्रेस पुस्ता तयार गर्ने
– ‘स्वरोजगार काङ्ग्रेस, स्वाभिमानी काङ्रेस’को अभियान सन्चालन गर्ने
– आवश्यकताका आधारमा जिल्लाभित्र हरेक तहमा प्रशिक्षण कार्यक्रम संचालन गर्ने
-जिल्लाको आवश्यकताका आधारमा लगानीको वातावरण निर्माण गर्ने
-प्रवासबाट नेपाल फर्किएका सदस्यहरुलाई जिल्लाभित्रै रोजगारी र लगानीको आधार निर्माण गर्ने
– सबै राजनीतिक दलहरुसङ्ग सहकार्य गर्ने र काङ्ग्रेसको नेतृत्व सुनिश्चित गर्ने

नेपालदीपमा प्रकाशित सामग्रीबारे तपाईको गुनासो, सुझाव तथा सुचना भए हामीलाई [email protected] मा पठाउनु होला ।

प्रतिक्रिया
सम्बन्धित समाचार

ताजा अपडेट