शुक्रबार, असोज २१ २०७९

सशस्त्रमा एआइजीको दरबन्दी थप्ने सरकारको निर्णय



  • नेपालदीप
  • बुधबार, भाद्र २९ २०७९
836
SHARES

सरकारले सशस्त्र प्रहरी बलमा अतिरिक्त महानिरीक्षक(एआइजी)को दरबन्दी थप गरेको छ । गत २१ भदौमा बसेको मन्त्रिपरिषद्को बैठकले सीमा सुरक्षा विभागमा एआइजीको दरबन्दी थप्ने निर्णय गरेको हो ।
हाल सशस्त्र प्रहरीमा एआइजीका दुई दरबन्दी छन् । कार्य तथा सीमा सुरक्षा विभागलाई छुट्टाछुट्टै विभाग बनाउन लागिएको हो । स्रोतका अनुसार सीमा सुरक्षा विभागको दरबन्दी संरचना पनि स्वीकृत भइसकेको छ । जसमा एक एआइजी, एक डिआइजी, एक एसएसपी, तीन एसपी, सात डिएसपी, आठ इन्स्पेक्टरसहित ७६ जनाको दरबन्दी कायम भएको छ ।

थपिएको नयाँ दरबन्दीमा सिनियर डिआइजी वंशी दाहालको बढुवा हुने सम्भावना रहेको स्रोत बताउँछ । उनी हालका प्रहरी महानिरीक्षक राजु अर्यालकै ब्याचका हुन् । एआइजीको दरबन्दी थपिएसँगै सशस्त्रको कुल दरबन्दी ३७ हजार ५५ पुगेको छ ।

सशस्त्र प्रहरी बलमा सरकारले कहिले एआइजीको दरबन्दी कटौती गर्ने त कहिले थप गर्ने निर्णय गर्दै आएको छ । पाँच वर्षअघि शेरबहादुर देउवा नेतृत्वकै सरकारले पाँच दरबन्दी थपेर बढुवा गरेको थियो । पछि केपी ओली नेतृत्वको सरकार गठन भएपछि उनीहरूलाई राजीनामा दिन लगाई पाँच दरबन्दी कटौती गरी दुई मात्र राख्ने निर्णय भएको थियो । उता सरकारले नेपाल प्रहरीका एआइजी सहकुलबहादुर थापाको प्रहरी एकेडेमीमा सरुवा गरेको छ ।

 

नेपालदीपमा प्रकाशित सामग्रीबारे तपाईको गुनासो, सुझाव तथा सुचना भए हामीलाई [email protected] मा पठाउनु होला ।

प्रतिक्रिया
सम्बन्धित समाचार