अल नासरमा रोनाल्डोको डेब्यु

९ माघ, काठमाडौं ।

क्रिस्टियानो रोनाल्डोले साउदी क्लब अल नासरका लागि प्रतिस्पर्धात्मक खेलमा डेब्यु गरेका छन् ।

आइतबार साउदी प्रो लिगअन्तर्गत एतिफाकविरुद्धको खेलमा रोनाल्डोले अल नासरका लागि डेब्यु गरेका हुन् ।

रोनाल्डोको कप्तानीमा घरेलु मैदान एमरसुल पार्कमा भएको खेलमा अल नासरले एतिफाकमाथि १-० को कठिन जित निकाल्यो।

अलनासरका लागि ब्राजिलियन खेलाडी टालिस्काले निर्णायक गोल गरे। उनले खेलको ३१ औं मिनेटमा गोल गरेका थिए।

जितपछि अल नासर १४ खेलबाट ३२ अंक जोडेर शीर्ष स्थानमा छ । १६ खेल खेलेको अल हिलाल ३१ अंकसहित दोस्रो स्थानमा छ ।

३७ वर्षीय रोनाल्डोले गत महिना साउदी क्लबमा अनुबन्ध भएका थिए ।

यसअघि रोनाल्डोले अल नासर र अल हिलालका खेलाडी सम्मिमित रियाद अल स्टार एघारको कप्तानी गर्दै फ्रेन्च क्लब पेरिस सेन्ट जर्मेइनविरुद्ध मंगलबार खेलेका थिए ।

पेरिस सेन्ट जर्मेइनले उक्त खेल ५-४ ले जितेको थियो । जहाँ रोनाल्डो २ गोल गर्दै म्यान अफ दि म्याच बनेका थिए । पेरिसका लिओनल मेसीले एक गोल गरेका थिए ।

रोनाल्डो क्लमा भित्रिएको लामो प्रतिक्षापश्चात डेब्यु गरेका हुन्। म्यानचेस्टर युनाइटेडमा रहँदा लागेको दुई खेलको प्रतिबन्धका कारण उनले पछिल्ला खेल गुमाएका थिए।