मंगलबार, माघ २४ २०७९

राष्ट्रपति निर्वाचनमा विवाद



  • नेपालदीप
  • सोमबार, माघ ९ २०७९
475
SHARES

माघ ९ , काठमाडौं |

राष्ट्रपति निर्वाचनलाई लिएर फेरि संवैधानिक र कानुनी विवाद देखिएको छ।

राष्ट्रपतिको कार्यकाल कहिलेदेखि सुरू हुने भन्ने विषयबाट यो विवाद उत्पन्न भएको हो। यो विवादसँगै राष्ट्रपति निर्वाचन कहिले गर्ने भन्नेबारे अन्योल देखिएको छ।

नेपाली कांग्रेसले कुनै पनि बहानामा राष्ट्रपति निर्वाचन नसार्न सरकार र निर्वाचन आयोगलाई ध्यानाकर्षण गराउने निर्णय गरेको छ ।

पार्टी सभापति शेरबहादुर देउवाको निवास, धुम्बाराहीमा सोमबार बसेको कांग्रेस पदाधिकारी र पूर्व पदाधिकारीहरुको बैठकले राष्ट्रपतिको निर्वाचन समयमै हुनुपर्नेमा जोड दिएको छ ।

संविधानको धारा ६३ मा राष्ट्रपतिको कार्यकाल निर्वाचन भएको मितिले पाँच वर्ष हुने भनिएको छ। राष्ट्रपति निर्वाचनसम्बन्धी ऐनमा भने कार्यकाल सकिनुभन्दा एक महिनाअघि राष्ट्रपतिको चुनाव हुने गरी मिति तोक्ने भनिएको छ। उक्त कानुनमा निर्वाचन परिणाम आएपछि राष्ट्रपति निर्वाचित भएको मानिने पनि उल्लेख छ।

यसरी नयाँ राष्ट्रपति निर्वाचित भइसकेपछि पनि पुरानो राष्ट्रपतिको कार्यभार कायमै रहने भएकाले समस्या देखिएको हो।

अब ऐनअनुसार निर्वाचन गर्ने हो भने एक महिना देशमा दुई जना राष्ट्रपति हुने देखिन्छ । निर्वाचन आयोगले राष्ट्रपति निर्वाचनका सन्दर्भमा संविधान र ऐन बाझिएको विषयमा दुई वर्षअघि नै तत्कालीन प्रधानमन्त्रीलाई जानकारी गराइएको थियो । त्यो बेला स्थानीय तह, प्रदेश र संघीय संसदका चुनावका सन्दर्भमा पनि यस्तै कानुनी उल्झन रहेकाले सबैलाई सम्बोधन गर्ने गरी कानुन बनाउने भनिएको थियो । तर अझैसम्म कानुन संशोधन भएन ।

वर्तमान राष्ट्रपति विद्यादेवी भण्डारी २९ फागुन २०७४ मा निर्वाचित भएकी हुन् । यसअनुसार उनको ५ वर्षे कार्यकाल २८ फागुन २०७९ सम्म कायम रहन्छ । तर राष्ट्रपति तथा उपराष्ट्रपतिको निर्वाचनसम्बन्धी ऐनअनुसार २९ माघअघि नयाँ राष्ट्रपति चुनिने गरी निर्वाचन घोषणा गनुपर्छ ।

पाँच वर्षअघि वैशाखदेखि असोजसम्म तीन चरणमा स्थानीय तहका चुनाव भएका थिए। कानुनले असोजमा भएको चुनावलाई पनि वैशाखमै भएको मान्नुपर्ने उल्लेख गरेको छ। यही कानुनी व्यवस्था संविधानविपरीत भन्दै विवाद उठेको थियो। त्यसमाथि कानुनमा भने दुई महिनाअगावै निर्वाचन गर्ने व्यवस्था थियो।

यो विवाद सर्वोच्च अदालत पुगेको थियो। सर्वोच्च अदालतले यसमा कुनै निर्णय गरेन।

नेपालदीपमा प्रकाशित सामग्रीबारे तपाईको गुनासो, सुझाव तथा सुचना भए हामीलाई [email protected] मा पठाउनु होला ।

प्रतिक्रिया
सम्बन्धित समाचार