मंगलबार, माघ २४ २०७९

बिपी स्वास्थ्य प्रतिष्ठानका उपकुलपति डा. ज्ञानेन्द्र गिरीविरूद्ध मुद्दा दायर



  • नेपालदीप
  • सोमबार, माघ ९ २०७९
893
SHARES

९ माघ, काठमाडौं ।

अख्तियार दुरुपयोग अनुसन्धान आयोगले वीपी कोइराला स्वास्थ्य विज्ञान प्रतिष्ठानका उपकुलपति डा. ज्ञानेन्द्र गिरीविरुद्ध भ्रष्टाचार मुद्दा दायर गरेको छ ।

उनले नपाएको ओहोदा पाएँ भनी पदीय मर्यादा विपरीत काम गरेको भन्दै अख्तियारले उनीविरुद्ध विशेष अदालतमा मुद्दा दायर गरेको हो ।

गिरीले प्राध्यापक नभई प्राध्यापक हुँ भनी उक्त पदको प्रयोग गरेकाले भ्रष्टाचार मुद्दा दायर गरेको अख्तियारका प्रवक्ता श्यामप्रसाद भण्डारीले बताए |

तत्कालीन स्वास्थ्यमन्त्री भानुभक्त ढकालले नियुक्त गरेका उपकुलपति गिरी नियुक्तिको केही समयदेखि नै विवादमा तानिएका थिए।

खासगरी मेडिकल सामग्री खरिद तथा अन्य आर्थिक कारोबारहरूमा उनले बद्नियत देखाएको भन्दै प्रतिष्ठानमा लामो आन्दोलन चलेको थियो। यसबाहेक उनले नामका अघि प्रयोग गर्दै आएको प्राध्यापक पदवी पनि नक्कली भएको प्रमाणित भइसकेको छ। अख्तियारले त्यही पदवी उपयोगको विषयलाई मुद्दाको मुख्य विषय बनाएको छ।

अख्तियार प्रवक्ता श्यामप्रसाद भण्डारीका अनुसार ‘आधिकारिक निकायबाट प्राप्त नभएको ओहोदा पाएको भन्दै प्रोफेसर पदको दुरूपयोग गरेकोले’ मुद्दा दायर गरिएको हो।

उपकुलपति जस्तो पदमा नियुक्ति भइसकेपछि नियमित काम गर्ने क्रममा अरुले विश्वास गरोस् भनी बदनियत साथ कुनै पनि आधिकारिक निकायबाट प्राप्त नगरेको, नपाएको ओहदा पाएँ भनी अरुले विश्वास गर्ने गरी प्रोफेसर पद प्रयोग गरेको देखिएको अख्तियारको भनाइ छ ।

डा. गिरीले गरेको काम भ्रष्टाचार निवारण ऐन, २०५९ को दफा १५ बमोजिमको कसुर भएको भन्दै अख्तियारले उनलाई सोही दफा अनुसार कारवाही गर्न माग गरेको छ । उक्त दफामा दपाएको ओहोदा पाएँ भन्नेलाई एक वर्षदेखि २ वर्षसम्म कैद र ५० हजार देखि १ लाख रुपैयाँ जरिवाना हुने व्यवस्था छ ।

अख्तियारले गिरी सार्वजनिक संस्थाका पदाधिकारी रहेकाले यस कसुरमा थप ३ वर्ष कैद गर्न माग गरेको छ ।

 

नेपालदीपमा प्रकाशित सामग्रीबारे तपाईको गुनासो, सुझाव तथा सुचना भए हामीलाई [email protected] मा पठाउनु होला ।

प्रतिक्रिया
सम्बन्धित समाचार